滿月送 ê 油飯、拜祖先 ê 草仔粿、五日節 ê 插青
kah 濟濟生活中 ê 習慣是對佗位來？
這本冊紹介傳統節日 ê起源，民間宗教活動 ê 變化 kah 台灣人對出世到過身所經過 ê 儀式。
冊內討論日常看到 ê 風俗習慣，對現此時 ê 角度探索社會文化 ê轉變。
Tshuā讀者對傳統習慣看tio̍h台灣社會 ê 改變，mā 發現無仝族群 ê 文化 kah 世界交流 ê 跤跡。
這本冊用文字 kā 喙講 ê 台語故事寫落來，是簡單 ê 台文，適合初學者。
01話頭
傳統節日篇
02台灣人是按怎 tio̍h 過年？
03正月十五查某暝
04元宵燈會對佗位來？
05清明挹墓粿
06荷蘭 mā 有食潤餅
07五月五日午時 ê 祕密
08查某鬼真濟，中元 suah 拜好兄弟
09中秋節是按怎 tio̍h 食文旦？
10月餅 kah 路邊烘肉
民間信仰篇
11媽祖承炸彈
12媽祖敢 tio̍h 轉去後頭厝？
13無仝款 ê 神豬比賽
14神明 mā ē 開藥單
15鬥顧囡仔 ê 床母 kah 七娘媽
生命儀式篇
16滿月食油飯
17做月內 ê 三十斤米酒
18一百冬前 ê 婚禮 kah 聘金
19喪事 ê 罐頭塔
編輯說明
Kah 囡仔出生有關係 ê 禮俗，自古早就有真濟，而且遮 ê 禮俗猶 ē 綴時代改變，有 ê 習慣慢慢無去，有一寡新 ê 活動 ē 出現。這馬囡仔生了少，所以對大腹肚、囡仔出生到度晬[i]攏有袂少慶祝 ê 方式。佇醫學猶未遐爾發達 ê 年代，一个紅嬰仔平安大漢無遐爾簡單，所以袂少禮俗攏是 leh 替囡仔求平安。尤其度晬進前 ê 禮俗上濟。對過去到這馬 kah 紅嬰仔有關 ê 禮俗有啥物？是按怎變化？咱一項一項來講。
過去有生囝報喜這款風俗。紅嬰仔出生 ài 先報喜。是欲報予啥乜人知？tio̍h 先予囡仔老母後頭 ê 人知影。農業時代交通無方便，紅嬰仔出生時 ē 專門派人通知後頭厝，這號做報喜。紲落來 tio̍h 準備一份麻油酒雞 kah 油飯轉去後頭拜公媽，mā ē 送一份麻油酒雞 kah 油飯去媒人 in 兜，這叫做報酒。後頭厝接著報喜，就準備雞仔、米酒、麻油送予查某囝做月內。這馬一通電話就 ē 當報這 ê 好消息，m̄ 免遮爾麻煩，送禮攏等到滿月才做伙送。
古早時紅嬰仔出生 ê 第三工有一个做膽 ê 儀式，叫做「三朝做膽」。因為紅嬰仔出生 ê 時，產婆 ē 用油替伊拭身軀，紲落來就等到第三工阿公阿媽才 ē 用水 kā 囡仔洗身軀。洗身軀 ê 水內面 ē 囥桂花、柑仔葉 kah 三粒石頭仔。桂花心代表富貴；柑仔葉代表濟囝孫；是按怎 tio̍h 囥石頭仔？第一 ê 講法 kah 做膽有關，為著欲予囡仔袂 tio̍h 驚，欲囥落去水底 ê 石頭仔 ài 揀拄仔好大細。因為膽袂使傷細，才袂無膽，m̄-koh mā 袂使傷大膽，啥物攏 m̄ 驚。而且石頭仔 ê 形 tio̍h-ài 圓，个性才 ē 圓 koh 好。第二 ê 講法是向望嬰仔足健康，有一个親像石頭遐爾𠕇[ii] ê 頭殼。
石頭 kah 膽大細有啥物關係？這有一个真有意義 kah 紀念性 ê 典故。佇 200 冬前蹛佇蘭陽平原 ê 先民，in 欲去淡水做工課 iah 是做生理，kan-na 有一條路 thang 行，就是接淡水廳 kap 葛瑪蘭廳 ê 淡蘭古道，其中 ê 一段是有名 ê 草嶺古道。因為這條路足歹行，而且 koh 有可能遇著強盜，所以 in ē 先抾一粒路裡 ê 石頭仔，提去草嶺古道彼間天公廟過爐，求天公派文官、武官保護家己一路平安，工作順序。拜拜煞就 kā 這粒石頭紮佇身軀邊當做護身符，這 mā 是向天公借膽 ê 意思。
現此時紅嬰仔一出生就有護理人員 kā 伊洗身軀，已經無「三朝做膽」ê 習慣，顛倒是有廟寺 ē 舉辦向天公借膽 ê 儀式。佇古道入口 ê 天公廟就是宜蘭頭城鎮 ê 草嶺慶雲宮。這間廟對 2011 年開始舉辦向天公借膽。這馬 ê 人佇路裡遇著 ê 風險 khah 少，向天公借膽 ê 儀式 m̄ 是欲求平安，是欲求功名。借文膽 ē 有智慧，借武膽對事業有幫贊。石頭仔做膽，mā 是提醒逐家 ē 記得 200 冬前先人盤山過嶺，開拓台灣東西兩爿 ê 辛苦。
紲落來嬰兒出生 24 工 iah 是滿月時 ē 剃頭毛。是按怎 tio̍h 剃頭毛有濟濟講法：有人講佇第 24 工剃毛代表囡仔大漢 ē 學二十四孝，變做有孝爸母 ê 人；mā 有傳說是有人提胎毛筆參加考試 tio̍h 狀元，後來逐家就學伊，kā 紅嬰仔 ê 胎毛剃掉來做胎毛筆。Koh 有人 kā 胎毛 kah 嬰仔 ê 肚臍帶做伙做一粒印仔，髮（發）kah 臍（財）鬥起來就是發財印仔。Mā 有人講剃胎毛是 ài kā 垃圾[iii]物件除掉，tio̍h 準備雞卵 kah 鴨卵；剃頭師傅 ē 提雞卵佇紅嬰仔面頂畫圓箍仔，koh 提鴨卵佇紅嬰仔 ê 身軀畫圓箍。
一个紅嬰仔若出生滿一個月就表示已經渡過一个重要 ê 階段，這時 tio̍h 準備油飯拜謝神明，kā 油飯分送予親情朋友。產婦 ê 後頭 ài 送囡仔「頭尾禮」，就是對頭到腳穿 ê 物件，有衫、帽仔、鞋仔、襪仔，mā ū 送金旆鍊、手環、手指。是按怎滿月 ài 食油飯？有一款講法是過去做月內對一般家庭是真大 ê 負擔，所以若有人生囡仔，親情朋友 ē 送雞仔、米酒、麻油 kā in 鬥做月內。做月內了賰 ê 酒 kah 麻油就提來炊油飯。油飯先提去廟裡拜拜，才 koh 分予親情朋友，感謝 in 鬥相工。油飯 ē 甲一粒紅卵，過去重男輕女，若是生查埔，油飯 ē kà 一支雞腿；若是生查某，台灣中部習慣是提早一工做滿月。這馬 mā 有人用雞卵糕代替油飯 kah 紅卵。
大部分囡仔佇六個月開始發牙以前攏 ē 一直流喙涎，所以古早 ē 佇四個月左右替囡仔收涎。傳統收涎 ē 準備六、八 iah 是十二个收涎餅，koh 用紅線kā 收涎餅縛做伙掛佇囡仔 ê 胸坎頭前。負責收涎 ê 序大就提一塊餅替囡仔拭喙涎，目的是為囡仔解決流喙涎 ê 問題，mā ē kā 紅線縛佇囡仔 ê 手 kah 腳，代表伊大漢袂做無正當 ê 代誌，成做一个守規矩 ê 人。過去囡仔佇 4 个月前攏袂使出外，收涎就變成是囡仔第一擺予親情朋友、厝邊頭尾[iv]看 tio̍h，予in熟似這个囡仔，以後 ē 鬥照顧這个囡仔。
到度晬就有試週[v]，就是提代表各行業 ê 工具予囡仔揀，來臆伊大漢 ē 做啥物工課。試週儀式開始前 ài 準備一對麵龜 kah 一个米香，mā 有蘋果、雞腿、蔥仔。囡仔 ê 雙腳先踏麵龜，意思是：「雙腳踏麵龜，開智慧 ē 讀書」。提米香予囡仔食，表示 「學講話攏真香，ē 有人緣得人疼」。Mā 有人予囡仔咬蘋果是代表平安，咬雞腿代表 m̄ 免煩惱食穿，mooh 蔥是聰明 ê 意思。紲落來才 kā 代表各行各業 ê 物件囥佇一个大 ê 米篩頂頭，像冊、筆、算盤、錢、印仔、雞腿、尺，予囡仔坐佇米篩中央提家己合意 ê 物件。現代人 ê 職業 kah ē 使做 ê 工課 kah 過去真無仝款，試週囥 ê 物件 mā 已經無仝。這馬無人 ē 排鋤頭予囡仔提，顛倒有計算機、滑鼠這種現代 ê 工具。
（......）
[i] 度晬tōo-tsè：周歲
[ii] 𠕇 tīng：硬
[iii] 垃圾lah-sap：汙穢，不乾淨
[iv] 厝邊頭尾 tshù-pinn-thâu-bué：鄰居、左鄰右舍
[v] 試週 chhì-chiu：抓週
出版日期 2022/07/31
ISBN 978-626-96323-1-2 (有聲冊)
EISBN 978-626-96323-0-5 (電子冊)
