用聲音紀錄土地，用台文傳承文化

逐家好，我是 Hena Ma。 

〈台灣人台灣事〉Podcast ê 製作人，《台語．生活》電子報發行人，mā 是培鈺工作室 ê 主理人，目前上主要 ê 身份是一个家庭照顧者。

我出世 tī 嘉義。2005年我提著社會學博士，對德國轉來台北食頭路 ê 時，掠準逐家 kah 我相仝，會曉講台語，只是無機會 thang 講爾爾。2020年數念台語 ê 我開始錄音，彼時拄好疫情 kah Podcast 同齊時行。做全台語ê節目，才發現家己 ê 台語干焦有幼稚園程度，tī 厝內使用 ê 語詞無夠通 kā一个議題講甲齊全。Koh 較料想袂到 ê 是，原來慣勢聽台語、講台語 ê 人已經愈來愈少。

智覺著台語變做無啥人 leh 使用 ê 語言，加上濟濟聽友鼓勵，〈台灣人台灣事〉tō 逐禮拜放送到今。

我對現此時 ê 生活內面搜揣這 phiàn 土地 ê 故事，綴先輩 ê 跤跡去了解學校無教ê台灣歷史，用簡單ê語詞講予逐家聽，練習用台語講生活、講萬事、講萬物。

會學寫台語有兩个原因，一个是放送 ê 時讀台文字稿才bē講重耽去，另外一个是寫落來，hōo 聽友會當那聽那讀，做伙學台文。文字使用對語言 ê 傳承足要緊，這是我kā節目內容整理出版，kah 推捒台文數位化ê原因。

請鬥陣來參與這个文化

做這个Podcast是一个kah聽友鬥陣學習 ê 過程，這hōo我對身軀邊ê人有新ê理解，對現此時發生ê代誌有新ê認捌，對我所徛起 ê 島嶼 tī 世界 ê 位置有新 ê 看法。

無論你是佮意聽台語故事，iah 是 beh 揣一本好讀 ê 台文冊（台語書籍），lóng 歡迎來這个網站看覓。邀請咱聽一集節目，iah 是紮一本冊轉去。做伙練習，用咱 ê 母語，kā 台灣 ê 故事講予 koh 較濟人聽。