台語冊內的地景

到底猶有偌濟人leh買冊、看冊？我臆定tio̍h是愈來愈少。若無人買，無人看是不是未來ê書就會愈來愈少？因為按呢文化部逐冬lóng ē補助讀冊會，介紹文學、哲學，介紹冊ê活動kah計畫。Tsit擺我猶是beh來介紹幾本台語冊，m̄-kò方式ē kah舊年無仝。〔......〕

我想真濟人lóng認同若一个語言beh傳承，文字是蓋重要。我mā認為若是已經聽有koh 會曉講ê人，beh學ē曉讀，ē曉寫台語文，m̄是遐爾困難。為tio̍h 予koh較濟人認捌已經寫出來ê台語文學，tsit个節目今年ē一個月介紹一部小說。Tsit擺我揀ê台語小說，除了lóng是提過獎，真好看ê作品以外，主要是冊內有清楚ê地理風景iah是有實際路線ê介紹。

是按怎阮beh按呢揀？一部小說內底m̄-nā有人物，有ê猶有地理空間，景色，地方歷史ê描述，這ê內容m̄-nā 予讀者了解故事ê背景，山勢地形，在地ê人文光景，有koh較濟是表達作者對彼ê所在ê感情。台語小說有袂少作品是用社會寫實ê手路kā讀者講在地ê、無論是過去iah是現在ê，人物kah地理空間。

地理空間就像是一個大碗公，內底ē使貯人ê想法、in ê行為kah行動，過去ê歷史、族群ê故事、共同ê記憶mā lóng tī 一個空間內底揣ē tio̍h。像去年介紹ê冊，王昭華ê散文有淡水kah台北ê地點kah路線，洪淑昭ê《錦荔枝的滋味》就發生tī新草衙這个所在。遮ê冊內lóng有寫著地理空間kap地景。

Tsit改我tī節目內底ē介紹作者寫tio̍h ê地理空間，m̄-kò重點是囥tī「地景」。地景是包括地理以外，當地人ê生活方式，iah是當地文化kah物件ê關係，甚至人ê權勢展現ê形式，人kah世界ê關係都算是地景ê一部分。只不kò m̄是逐个人看著ê地景lóng相仝，趣味ê就是地景ē綴看ê人ê角度leh改變，因為逐人按怎看，按怎想kah按怎解釋伊看到著ê，伊所感受著ê lóng 無相仝。所以我ē介紹作者看著ê地景是啥物款，我mā ē講我知ê彼ê所在是koh啥款，特別是猶ē介紹別人講ê，彼ê地點ê故事kah人文歷史。

所以tsit擺m̄-nā紹台語冊，台語作品，猶ē用小說𤆬逐家熟似hia-ê所在，介紹一寡當地ê歷史文化kap故事。若按呢tsit樣這次ê閱讀推廣計畫beh介紹啥物冊？總共是六本，我uì台灣北爿到南爿ê順序來介紹：

第1本是藍春瑞老師ê《無影無跡：藍春瑞台語小說集》，2009年李江却基金會出版ê冊。藍春瑞老師是自1997年，猶leh教冊ê時陣就開始用台語創作，伊捌提過真濟擺教育部的ê母語文學獎。Tsit本小說集內底收集伊逐冬得獎ê作品。我會介紹這本內底上長ê一篇寫實小說，tsit篇也有提著2007年阿却賞ê頭賞。Tsit篇ē𤆬逐家熟似基隆河邊ê土炭礦區kah過去挖礦工人ê生活。基隆ê炭坑有300冬ê歷史，後來koh發現有砂金，所以大清時代就tī基隆設金砂局，tī 遮收挖砂金ê牌照稅。日本人來了後，發現遮m̄-nā產金仔猶有銀kah銅。國民政府來以後，koh開新ê礦坑，一直到1980年代才漸漸收起來。Tī猶leh挖黑金ê年代，全台灣各地ê人lóng ē來遮揣工課。藍老師tsit篇文章就是leh介紹做工人ê生活。

第2本是王羅密多 ，本名叫做王永成老師ê《地獄谷》，這本較新，2022年前衛出版。王永成mā是提真濟項文學獎，而且伊m̄-nā寫小說，伊ê台語詩、小說、散文，tsit三類作品lóng得過台灣文學獎。〈地獄谷〉是tsit本仝名ê冊內ê頭一篇。Tsit篇小說寫ê是北投ê地方派系。北投tsit个所在真有歷史，西班牙人有記載ê Quipatao就是巴賽族ê北投社。Tsit篇小說寫選舉oo-se買票，地方政治人物按怎kah民眾搏感情，kā地方選舉kap北投tsit个所在寫kah真詳細。

第3本beh介紹ê是陳明仁老師寫ê《拋荒ê故事》，tsit本是2000年第一擺出版，2012年前衛整理過，分做6輯出版，koh有錄CD；2020年才koh重編輯出版。陳明仁是戰後重要ê台語作家，作品誠濟。早期較出名ê是台語詩，《拋荒ê故事》是陳老師第二本m̄是詩集ê出版。主要寫1960，1970年代老師伊家自己ê故鄉，彰化員林ê故事。這套冊有六輯，每一輯lóng有一个主題，我揀第四輯《田庄囡仔紀事》來講，因為內底有詳細介紹一寡路線kah地點。有關陳明仁老師ê研究kah分析這套《拋荒ê故事》ê論文已經袂少，這套冊是台語文學ê經典。

紲落來tsit本是uì台南寫到高雄koh到台東，陳雷老師ê《鄉史補記》，2008年開朗雜誌出版。陳雷uì 1980年代就發表第一篇台語小說，伊是台灣戰後真重要的一个台語作家。Tsit本《鄉史補記》mā是台語文學內面ê第一部長篇ê歷史小說。內底寫西拉雅族uì台南善化、玉井，遷去到高雄，koh pôaⁿ--kòe中央山脈去到台東，另外mā有一部分ê人是往嘉南平原去。小說寫tsit 200冬來，西拉雅族經歷無仝政權ê迫害、hōo人uì一个所在趕去另外一个所在，in ê語言kah文化按怎綴leh改變。有關《鄉史補記》ê研究論文已經誠濟，這本小說是真重要ê台灣文學作品。Tsit部小說較長，寫著ê所在也足濟，tī短短ê時間可能無法度lóng講著，我ē揀一寡所在分做兩集來介紹。

第5本是胡長松ê《復活的人》，2014年草根出版。Tsit本冊出版了隔冬，就提著吳三連文學獎。冊內面是一對愛人in leh寫批，故事主要講馬卡道人tī鳳山hōo鄭成功趕走，沓沓仔徙去屏東ê過程。內底ē講著台灣重要ê政治社會事件，mā講族群意識ê覺醒。Tsit本小說kah陳雷ê《鄉史補記》相仝，是用歷史敘事ê手路來寫台灣主體受著打壓koh按怎揣轉來ê一个過程。因為tsit部小說mā真長，我相仝用兩集ê時間揀一寡部分來講。胡長松老師伊捌寫長篇ê華語小說，2000年開始寫台語小說，已經有真濟得獎ê作品，2008年也提著台灣文學獎ê創作金典獎。

上路尾一本是tsin內面上少年ê作家，洪明道ê《等路》2021年九歌出版。Tsit本冊頭起先華語出版ê時就拿到2019年臺灣文學金典獎。後來洪明道老師家己kā冊翻做台語koh錄做聲冊。洪明道老師是提過真濟文學獎ê一个醫生。這本冊內底ê故事主要lóng是以伊ê故鄉高雄做背景，我ē uì內面揀一篇出來介紹。

老實講，我beh讀tsia-ê小說m̄是真簡單，特別是陳雷kah陳明仁老師in寫ê字詞真濟我lóng m̄捌聽過。所以kah舊年相仝，我ē kā tsia-ê資料kah節目內底講著ê內容lóng寫tī電子報。像一寡kah tsia-ê冊有關ê信息，有ê小說有真濟評論kah研究論文，有ê冊時常有線頂讀冊會，陳雷kah陳明仁老師ê冊mā有改編做廣播劇，橫直tī電子報ē kā我揣著ê資料寫出來hōo逐家參考。請逐家kah我做伙來讀tsia-ê小說，uì tsit個月起到11月，我逐個月ē簡單介紹tsia-ê冊，內面寫ê地理光景kah當地ê故事。Tsit擺beh介紹ê六本冊ē𤆬咱看著台灣無仝ê地景，mā向望tsia短短的ê紹kah推廣hōo逐家ē想beh看冊內按怎寫tsia-ê所在？tsia-ê作者有看著啥？未來mā ē想beh去tsia-ê所在行踏，建立出家己看著ê台灣地景。

今仔日beh來講藍春瑞老師tsit部小說《無影無跡》，寫ê是tī基隆河邊ê礦業kah tī遐食頭路ê人。小說寫主角阿文十外年來uì食公家頭路變做炭空ê頭家，koh因為發生事故，錢lóng無去，某也換人，lóng總變成空ê故事。小說講ê「無影無跡」m̄若是阿文累積ê錢kah伊十外冬ê時間lóng烏有去，mā是leh講過去基隆河兩爿ê山崙uì真濟人leh採炭、挖炭，靠tsit途食穿，舞到尾仔mā lóng「無影無跡」。

故事ê主角，阿文，頭先是tī 發電廠食頭路，負責買炭。彼時ê火力發電是燒土炭。阿狗就是負責替公司賣碳ê人。有一改阿文kā in嫌講土炭品質壞，內面ê石粉pha數傷懸，欲扣1成。為tio̍h參詳tsit件代誌，阿狗就請阿文去酒家。原來阿文是beh阿狗in公司逐個月開5張假發票hōo伊轉去報帳。像發電廠tsit款公家單位，若有烏西，袂是干焦阿文一个，是對上懸个頂司落來，真濟人lóng有牽連tio̍h。後來假發票tsit件代誌煏空，阿文hōo人降級，就辭頭路食家己。交土炭ê阿狗真gâu做生理，tī公司內面沓沓仔升去副理，suah惹著廠長ê伙計，hōo人降級。無法度就出來家己做。後來看著有人礦坑beh賣，就招阿文做伙投資，兩人家己做頭家。結果貪心肝去挖tio̍h保安ê炭層，挖一下hōo水灌入來坑內，工人死去，啥物錢lóng無趁著，iáu著了錢賠人，阿狗hǒng掠去關。

這是小說內底ê一條線，講採炭tsit个行業，土炭生意是按怎趁錢，按怎了錢，kah錢有關係ê部分。藍春瑞老師有寫「論真來講，世間人所結ê恩怨，若m̄是錢，tio̍h是情，絕對袂為別項。」(95頁) 所以小說內底猶有另外一條線，就kah感情有關係ê恩怨。阿文去kā廠商提假發票是按怎ē煏空?這就kah伊ê家內事有關係ah。阿文ê某，玉卿，先去打牌欠人錢，阿文tio̍h還，後來koh去學跳舞，tī舞廳鬥著一个姓方ê醫生做客兄。小說內面寫阿文按怎去tsáng著， tsit个醫生koh按怎hōo in某阿雲掠著。結果兩對尪某離緣，koh互相交換對象。阿文換來kah tsit个醫生ê某阿雲鬥陣。假發票ê代誌就是阿文離緣ê某，玉卿，掖掖出來ê。

Tsit部小說真好看，講ê是阿文uì tī發電場食頭路，無頭路，koh做頭家，十外冬累積落來ê錢koh一下手就烏有去，小說mā寫伊tī在這十外冬翁某發生ê代誌。Tsit个故事檢採ē使用華語寫，m̄-koh你若去讀小說就會發見啥物號作用脫離華語漢字思考，才有才調起造以台灣做主體性的文化。廖瑞銘老師就講，藍「春瑞寫ê小說題材，是m̄-bat台語、用華語文書ê人寫bē出--來-ê，就算講寫--出-來、ia̍h是kā翻譯做華語，mā一定會走味去。」小說內面有用著真濟我m̄捌ê詞彙，我會整理一寡tī電子報內底。M̄-koh較特殊ê m̄是遮ê台語詞彙，是作者思考ê語言kah表達ê方式。比喻藍老師寫著玉卿討客兄就像跋筊鬼相仝。我tsit-má就唸hōo大家聽伊是按怎寫：

「這種改袂斷根 ê pua̍h-筊人，kìnn nā ī 煞，siàng落去眠床suî kônn去，睏kah日頭beh晝，翻來píng去beh醒閣kán-ná m̄醒ê時，『天良」會雄雄tiô--出-來，m̄是thí笑就是教-sī， 修理 kah hōo 伊家己起懺悔、認錯，tsit時咒講後過m̄愛閣pua̍h—a，kán準神明真siànn ê款....；thìng 候到尾暗仔，日頭落山，人閣來招kiáu跤，tō『暗頭仔食西瓜，半暝反症』，對家己講日--時所咒ê無算是，這tauh ī煞才來改....；kāng款suá跤hānn過kiáu間ê戶tīng。」

Tsit个小說內底寫著ê文化地景m̄-nā一个，伊寫中產階級家庭，厝內ê財務分配、男女性ê關係、八大行業ê文化，真重要ê是，tsit部小說hōo讀者較了解礦業ê文化地景。這包括採炭生理ê風險，礦物局對礦區知識ê控制，做公家生理ê方式，炭坑發生意外，政府、媒體按怎處理hōo民眾看，炭坑買賣ê內幕kah挖礦tio̍h尊守ê規矩。

咱koh再來看小說內底寫著ê地點。阿文食頭路ê發電廠，是tī八斗仔（Peh-táu-á）已經收起來ê發電廠。這間是日本人tī北部起ê第一間發電廠，後來ê人kā號做北火電廠，是1939年起好，食ê是基隆、瑞芳附近ê土炭。北火電廠是彼當陣東南亞發電量上大ê火力發電廠。戰爭ê時陣hōo 人破壞去，1953年koh重起，一直運作到1983年才完全停機。阿文就蹛tī發電廠ê宿舍。Tsit个發電廠後來改做tsit-má逐家lóng ē去𨑨迌ê海生館。這應該也是第一間發電廠改ê博物館。北火電廠關起來了，北部用電beh按怎? Uì 1970年代，政府就tī附近另外起一間用重油（tiōng-iû）發電ê協和發電廠。

故事內面猶有寫著蹛八斗仔ê人ē去𨑨迌、鬧熱ê所在。

阿狗請阿文去食暗頓是約tī基隆田寮港邊ê一間日本料理店，後來阿文去揣一个兄弟來處理in某欠ê pua̍h筊帳，彼个兄弟就tī牛稠港開kiáu間。田寮港kah牛稠港聽起來像港口，我去揣地圖才知影m̄是港口，是溪仔，ē號做港是因為ē使停船仔。基隆有四條港，田寮港是uì東向西流；蚵殼港uì西向東流，tsit-má叫做西定河；石硬港uì南流向北，tsit-má叫做南榮河。牛稠港是uì西北流向東南；tsit四條河lóng流入去基隆港。

內底ê田寮港，本底就是用船運送土炭去海口ê路，日本時代koh改直，是臺灣第一條人工運河，規條有3公里半，負責kā月眉(gue̍h-bâi)山區ê土炭kah肥料工廠ê肥料運去到海口，所以政府機關、公司、店面mā lóng tī 遮，過去叫做田寮港庄，真鬧熱，有餐廳mā有人tī遮走唱，差不多是tī tsit-má基隆市ê信義區kah仁愛區彼tah。

冊內面猶寫著阿狗kah阿文食飽煞，去ê暗間仔，就tī基隆ê孝二路，藍老師寫in他們兩人「坐計程車uat入去基隆孝二路，行高架下跤ne-ong sih kah 誠鬧熱ê街市，正手pîng相連起ê大樓內底，有幾間仔外口寫商務酒店、聯誼中心ê店窗，kanpang 細細ki仔無偌hiánn目，ioh袂出內面是teh pìnn 啥báng，mā tio̍h-ài像阿文這款內行khuì ê ，才揣有路。」（29頁）。

誠趣味ê是小說kā玉卿去ê舞廳地址lóng寫出來，tī台北建成圓環邊，南京西路163號。冊內寫ê是一棟圓環城大樓，內面有舞廳kah旅館，看老台北人敢知？tsit-má彼ê住址附近猶看ē著真濟間旅館。

小說猶寫著基隆ê一个地點，就是阿文kah in某ê客兄方ê， 約tī自立冊店邊仔ê咖啡廳。若ē寫出來做標誌，應該就是真濟人知影ê地點。基隆人可能lóng知影自立書店，聽講已經開70外冬，這陣beh揣著開70外冬ê冊店是真僫揣。Tsit間冊店開tī義二路。義二路kah信二路ê路口，tī過去iáu號做基隆銀座，是真濟餐廳、咖啡廳ê所在。Tsit間冊店ê頭家過身無偌久，因為厝真舊tio̍h ài修理，伊ê序小kah基隆文化局去申請政府補助，整理了就ē重開幕。

小說內面寫ê人物lóng是有家庭，tng leh打拼趁錢ê歲數，小說有寫著這ê人平常時去郊外peh山、𨑨迌、運動ê所在。一个是阿雲去運動ê所在，是基隆主普壇ê大程，伊坐公車beh轉去八斗仔，才去看著in翁方ê kah玉卿做伙欲出門。

另外一个，阿雲招阿文去𨑨迌ê碧峰巖，阿文kā 伊講he是瑞芳人運動ê地方，uì瑞濱國小越入去，行無30分鐘就ē到。

猶有一位是，路尾送阿狗去坐監，阿文tshuā阿雲去月眉山ê靈泉禪寺，冊內有特別寫著阿文是按怎佮意去遐拜拜，「這間廟寺ê色tì 樸實簡單，木材kap石料攏無過漆包金；是袂hiánn目niâ，足耐看ê。」這間佛寺tsit-má是基隆ê文化資產歷史建築，也算是台灣北部佛教ê起源地。因為經過真濟擺整理，水泥ê部份愈來愈濟。內面真濟無仝年代起ê建築，開山堂是1891年起ê，koh較內底猶有靈泉三塔，是台灣真少看ê骨塔，外表像印度ê佛塔。 

小說路尾mā有寫阿文去看過去ê礦區，冊內寫「Kui山phiânn ê柴寮、鐵架kap電thiāu，袂輸去hōo B29 ê炸彈hám--著, m̄是斷做3-4 tsat, to是un落--去塗跤歇喘，遮佇頂á ê亞鉛片，歪來倒去beh lak á beh lak, tshun無1半有牢--著；生sian反紅ê機械、鋼索kap台車，強beh hōo suan uá—來 ê 葛薯 kap 鹽酸仔藤khàm—去」144頁，藍老師用這稀微的光景來講「1目nih十thóng冬，親像the做夢，beh sa 無半項，醒--來攏總空。」（145頁）

2000年ê時陣，台灣所有ê礦坑lóng封起來。基隆kah新北市tsit-má有袂少紀念礦業ê博物館，上出名ê應該是黃金博物館，m̄-koh逐家若去揣礦工紀念館、礦工文史館有袂少間，有政府出錢起ê，mā有過去舞炭空ê人家己成立ê，這是一段對台灣發展真重要ê歷史，真值得去熟似。 

最後我beh講ê是這本《無影無跡: 藍春瑞小說集》，已經無koh再印，圖書館mā足僫揣 ē tio̍h，m̄是無，是lóng借出去ah，m̄-koh若是問李江卻基金會iah是台語傳播公司，應該猶買 ē tio̍h。

王羅蜜多老師寫ê地獄谷tsit部短篇小說，寫議會選舉mā寫北投。

他uì一个讀研究所ê學生，阿良，ê視角來看1980年代台灣ê選舉政治。Tsit个學生阿良leh讀政治研究所，tio̍h-ài寫論文，題目就是「1980年代台灣地方選舉ê研究—以縣市議會選舉為模型」。因為有親情介紹，伊tō去做一个姓杜ê議員ê秘書，去見習，有錢thang提，koh ē使揣論文資料。故事背景是解嚴了ê第一冬，某縣市議會ê正副議長選舉。杜議員tō是準備beh做議長ê彼个。議會總共有49席，beh做議長tio̍h-ài有29票，上好是30票，才穩當ē牢。小說寫ê m̄-nā是買票，是投票進前tio̍h kā遮-ê票顧好，才bē偷跑去。所以議會投票前四工，杜議員就請幾个保鏢kah一台巴士kā tsit 30票做伙載去北投ê旅社顧hōo牢。Tsia-nī濟人關tī旅社的確是無聊。第一暗in先拍麻將，第二暗tō去食飯唱歌，去婊間（妓女間）。小說寫講第三暗，一个議員kā伊提著ê錢lóng輸了了，koh提30萬去婊間開。第四工透早巴士koh kā in規陣人，載去議會就任投票。故事到遮猶袂結束，杜議長選牢無幾工tō hōo人檢舉買票。結果害阿良hōo人憢疑是抓耙仔，伊驚甲beh始走去覕tī淡水，路尾才發見kah in去ê一个保鑣tō是警察，tsit贊代誌才ē煏空。

王羅蜜多老師ê台文寫kah足活跳，就像伊寫著：

「欲暗仔樓跤用餐後，所有的人攏回房。上樓梯的時陣有人詬詬唸： 誠無聊，無揣一寡消遣，強欲起痟矣！莊議員聽著耳風，就共伊房間的眠床捒一爿，撨出空間𥩴一塊四角桌，頓胸坎自動講欲扞內場予逐家耍甲歡喜。眾議員收著的料猶櫼甲橐袋仔膨獅獅，無地透氣，規群做一下陷倚來。

規暝，這間房薰味嗾鼻茫煙散霧，勝過地獄谷，檳榔是改良的北投化石，一粒一粒擲入鐵齒的筊徒喙裡，哺兩三下，竟然也嘔óo出硫磺水來，這款的溫泉鄉。」（40-41頁）。

王老師tī話頭mā有寫著伊「發現用母語思考，用母語創作，會搜tshiau掀出自細漢到今，對出世佮生長的這片土地的記持。佇這个充滿性命經歷佮生活體驗的環境中，有誠濟故事，會一層一層浮上心肝穎。」（10頁）。

Tsit篇小說寫 ê 是議會選舉 ê 文化地景。縣市議會ê議長tsit个位真重要，議會beh開會ê時是議長決定案件排tī 啥物時陣審查，甚至伊mā決定案件敢著排入去。議員是tio̍h服務地方，替逐家撨代誌，M̄-koh若議員kah政府拄好無仝派就真歹講話，猶是著拜託議長。議長講話 ē 大聲是因為政府大小項代誌lóng tio̍h等候議會通過。所以2018年《天下雜誌》調查過，彼冬全國選牢 ê 22个議長，有14个身上lóng揹案，hōo人調查過，而且tō是烏西買票-ê上濟。

小說真趣味ê是寫買票koh驚有人ē跑票，koh hōo別人買走，就kā所有ê人lóng請去北投洗溫泉，hōo in bē kah別人接觸。內底猶有寫著因為「驚有人暗中走票，死毋承認，就配分逐張票佇無位置圈選，踮指定所在拗一角、兩角......，抑是偏倒爿正爿、對中心線等等，精密的設計分配，開票的時陣方便辨認，掠出反背者。」（51頁）。

議長選舉買票tio̍h-ài ē使保證一定ē投hōo給買票 ê 人，所以自過去到今，除了冊內寫 ê 逐張票做記號，另外就是圈選了後，提hōo別人看伊選hōo誰。Tsit个現象已經真久，也時常lóng有人檢舉，引起討論。一般人去投票是有無記名原則，就是bē使hōo別人知影伊投hōo誰，驚ē受著影響iah是影響著別人。M̄-koh議員選議長無仝，議員是代表民眾去投票，所以伊hōo別人知影伊投hōo誰是一種交代，經過真濟討論，2016年立法院直接tī 地方制度法規定議會內面lóng tio̍h-ài記名投票。

紲落來講北投tsit个所在，tsit部小說若m̄是以北投做背景，敢ē無仝？王老師tsit部小說kah真濟ê作品相仝，lóng有伊beh傳達ê訊息。主角阿良tī內底看遮ê議員leh做ê代誌「突然間感覺好笑，人用錢買伊的票，伊閣用賣票錢來買小姐的虛情假意，這个世界真正荒譀hong-hàm無譜。」（47頁）。

所以這部小說叫做〈地獄谷〉，地獄谷就是這陣北投 ê 地熱谷，mā是遮ê人kah金錢，kah權勢做伙墮落ê所在。小說內底寫ê北投是景色真好，m̄-koh「住戶和外客欶著的空氣，卻是khiok-sī是粉粉的漚芳」。冊內底寫1980年代ê北投kah去遐ê政治人物相仝了然，去到遐就是入去地獄谷。

北投ê婊間kah溫泉觀光ê發展是直接ê關係。第一的tī北投開溫泉旅館ê，m̄是日本人，是一个德國人，伊來做硫磺生理，發現彼tah有溫泉，就開一間俱樂部，m̄-koh無對外開放，所以知影ê人無濟。隔冬日本人mā有來遮經營旅館，頭起先是日本軍隊發現tsit个所在，就先設軍人度假kap療養 ê 地點，m̄-koh民眾mā 愛洗溫泉，所以就開始有商業旅館，來𨑨迌 ê 人變濟，酒家mā愈開愈濟。

戰後政府是按照工作發執照hōo tī遮提供服務ê女性，有跳舞ê，有掠龍 ê，無仝 ê 服務有無仝 ê 執照，真緊tī 1960年代北投變做是日本觀光客一定 ē 來 ê 所在，彼時美國人tī越南相戰，放假ê時陣tō ē來台灣𨑨迌，in mā是會來北投，北投就m̄-nā是溫泉鄉，也叫做溫柔鄉。因為旅館 ê 生意足好，所以北投ê酒家菜、那卡西、服務生、kah摩托車載人、載貨lóng變做當地 ê 特色。

1967年美國雜誌《Times》內底介紹美軍來台灣𨑨迌，有一張是美國人kah兩个女性tī北投洗溫泉 ê 相片。這張相片轟動台灣，這陣 tī 北投 ê 博物館猶看ē著，tsit張iah演變做美玲事件。台灣刊tī 國外雜誌 ê 相片suah是兩个無穿衫 ê 服務生kah一个美國人，這hōo政府足無面子，就決定beh處理。M̄-koh政府無法度辦tsit个外國人，偆內底兩个台灣女性。Tsit兩人一个有牌，一个沒牌，若掠無牌ê，問題 ē 變較大，牽涉著較濟單位，所以上尾hōo人叫去審判ê，kan-ta tsit个有牌 ê 美玲。因為引起真濟討論，社會mā有真濟人替美玲講話，所以路尾是kā 伊判無罪。Tsit个事件hōo北投kap美玲大衝，逐人lóng beh去北投揣美玲，所已北投雄雄ke真濟人叫美玲。彼時北投mā有真濟換美金日票 ê 銀行。M̄-koh mā 為tio̍h tsit个事件hōo政府開始討論敢著停止發執照，禁止遮 ê 特種行業。

1979年李登輝宣布tio̍h-ài kā婊間消滅掉，這mā寫tī小說內面。王老師tō寫講 「毋過北投的地下酒家親像厲害的特種生物，靠保護色，連鞭化做旅館形體生存落來。𪜶成群結黨，真緊佇北投古老的地下地上建立二十四點鐘通道。」（36頁）。所以無政府承認 ê 婊間、妓女，m̄-koh特種行業 ê 生理iah是照做。

北投tsit个地名原本是平埔族語Qi Patauw，就是尪姨、尪婆 ê 意思。地熱谷過去叫做地獄谷就是長年煙霧，時常有人跋落去受傷，所以叫「地獄谷」，也有人講是「鬼湖」。Tsit 个所在西班牙人有寫著，1697年大清國 ê 官員郁永河就是beh來遮採硫磺。過去因為tsit款燒水bē當提來沃田，所以lóng kā 當作是無路用 ê 毒水。日本人來了，才開始推廣洗溫泉。

戰爭以後，tī 地獄谷煮卵mā 變做真濟人來北投 ê 活動，tī 地獄谷旁邊仔m̄-nā是ē使買tshenn ê雞卵，mā 有芋仔，番麥ē使擲落去煮。Mā 因為地獄谷tsit个名無好，才改做地熱谷。M̄-koh煮溫泉卵時常 ē 發生意外，1993年政府就完全禁止落去溪底煮物件。

冊裡猶有寫著「北投化石」，這是目前唯一用台灣地名號 ê 礦石。北投 ê 溫泉水有青磺，而且溫度真懸，溪內面 ê 石頭因為長期浸tī tsit款有青磺 ê溫泉水內面，外面沓沓仔ē結晶，這款石頭就叫做「北投石」。北投石tsit个名是1913 年日本學者去國際礦物會申請ê名，伊用ê 是日語Hokuto。

Tsit本冊 ê 冊名mā 號做地獄谷，內面有九篇小說kah八篇3千字以內 ê 極短篇。冊內猶有另外兩篇mā是leh寫選舉政治，一篇是〈台灣維基：選舉虎〉內底kā買票ê過程寫kah真詳細，主要leh寫國民黨分裂了後，兩个國民黨候選人無beh合作，所以路尾hōo一个無買票 ê 民進黨少年人贏去。〈阿猴〉tsit篇是leh寫一个單純 ê 做穡人，無想beh種田去做村長了後，慢慢行入政治，按怎學ē曉遐ê政治漚步，完全變作另外一个人。Tsit本冊內mā有寫歷史 ê 小說kah寫家庭、社會議題 ê 小說。

王永成老師tsit篇〈地獄谷〉是2019年台南文學獎台語小說ê頭賞，彼冬台南文學獎ê 華語詩頭獎mā 是王老師，伊寫台語mā 寫華語，著過真濟文學獎，捌出版華語冊佮台語冊，已經有九本，逐家若想欲看ē使tī 線頂上揣王羅密多。

今仔日beh紹介ê文章是陳明仁老師ê〈沿路搜揣囡仔時〉。陳明仁老師有真濟作品，伊寫ê文類也真濟。我ē揀這篇是因為內底有寫著真濟景，m̄-koh這篇m̄-n是寫景緻也寫感情。文章ê頭起先是寫作者ùi員林客運落車彼站，用行ê beh行入去庄內--伊ê故鄉，沿路看著的風景，伊想起ê代誌。後面才閣寫伊細漢佮一个查某同學ê故事。

伊寫伊沿路看著ê景致，閣寫伊細漢時對彼位ê記持，所以伊經過Phòng-phuh 寮á 講伊細漢時ùi學校欲轉去厝ē佇遐洗臉啉水，伊看著路līn已經揣無牛車溝，往過因lóng 會綴tī牛車後壁抽甘蔗。伊看著刺竹仔想著tī竹林內lak鳥鼠。伊寫講

「Sàn-chiah ê 年代，欠肉料油臊，khah êng ê 暗暝á 時，goán a 叔會用箠á tàu 磨尖ê 粗鉛線節，製造1 支lak 鑽，用電塗ê Ba-té-li̍h chhiō 路，專工去竹林lak niáu 鼠。Niáu 鼠目hō͘ Ba-te-li̍h chhiō--著，soah gāng--去，lak 鑽就lak--落，真準，這手工夫應該是平埔留--落來ê。」

紲落來in ē kā鳥鼠提轉去煮來食，伊講肉真甜。窮實真濟所在攏有人食鳥鼠，ùi歐洲、美洲、非洲到亞洲lóng有，我看著遮驚一下，頭擺知影台灣也有人食鳥鼠，mā是頭擺聽著lak鳥鼠這个詞。

伊沿路m̄-nā是想起過去，koh beh搜揣，因為伊記得ê kah 伊chit-má看著ê 無的確相仝，甚至ē使講變真濟，像 in兜也翻做磚仔厝，伊寫講「 舊hō͘-lêng 翻掉，連hit 叢苦lēng-á mā 早就剉--去，苦lēng kha 我gín-á 時tâi ê 記智，hō͘ 紅毛塗khōng tiâu-tiâu, 無tè chhōe 起。」

故鄉ê景講煞，紲落來伊就開始講故事。 In 厝後圳溝á ê 另外彼 pêng蹛一戶好額人，in ê細漢查某囝拄好kah伊仝班。因為這個女孩農曆3月14過生日，請他去，他才有機會去看著好額人厝生做啥款，食啥物好料。伊也是仝彼工生ê，m̄-kò自細漢伊就m̄bt做生日。

我對內底寫著電火真有印象，短短ê文章內底講著三擺電火。In 提電土ba-te-li去lak老鼠。伊去同學in兜欲轉去，同學gia̍h 1 支免電土就ē光ê「手電á」。電土ba-te-li應該就是用電土燈或是電石燈，Ba-te-li̍h是電池ê日語，m̄-koh tī 遮應該m̄是leh講電池，是講電土燈。電土燈進前tī節目捌介紹過，《台灣日常》tsit本tsheh寫電火ê出現也有寫著。電土滴著水ē有一種氣，點火就ē𤏸，所以mā有人講是水火燈、瓦斯燈。暗時巡田抑是拍獵lóng真好用。結果in兜用電土燈，好額人已經leh攑手電仔。陳明仁老師mā寫，in同學ê厝，暗時電火光phà-phà，m̄-koh in庄內無tshāi半支電火柱。好額ê同學kah in兜ê電kah光代表現代化kap工業化，是伊細漢時陣真欣慕ê物件。M̄-koh 遮ê現代化、工業化也是後來改變伊故鄉面貌ê因端，當伊有歲koh轉來，足數念ê物件因為遮ê變化攏無去矣。伊細漢羨慕--ê，變做大漢以後，怨嘆--ê。

兩个囡仔ê故事uì 提第一名ê獎品去換鉛筆轉來，就足精采，發生啥物代誌我先莫講>我讀了後，感覺國校三、四年ê囡仔就tsiah-ni̍h有心機，應該是往過ê人較早捌代誌才對。故事就是故事，真真假假，無一定tio̍h-ài合現實。就像老師有講， 農曆3月14過生日彼工，文章寫講伊beh轉去厝ê時陣，天頂有真濟星。結果編輯就有共伊講，滿月的時天頂看無星，伊無改，是欲等看敢有讀者ē發現寫m̄ tio̍h。

廖瑞明捌呵咾講，陳明仁ê作品有3項特色：第 一、伊是百分之百ê台語書寫，伊對台語ê語氣、語感特別講究，第 二、陳明仁想beh借鄉土人物來建構tī工業化進前在地文化ê價值觀，向望tī tsit種價值觀內底，建立台灣人ê自信，第三、伊用小說來替土地記錄，寫一草一木kap街仔路、建築 ê演變，透過文學來表達lán對土地ê疼。 用tsit三點來講這篇文章lóng真適當。

紲落來lán來講tsit篇文章寫ê二林原斗里竹圍仔。冊寫講，陳明仁老師ê故鄉是原斗里竹圍仔庄。我到今才知影是按怎beh寫原斗竹圍仔，是因為彰化猶有一个竹圍仔tī香田。 原斗tī較北爿，也有人kāi叫做頂竹圍仔，香田tī西南爿，所以也叫做下竹圍仔。

二林tsit个所在交通真無方便，m̄是真濟人熟似ê所在。講著二林，先想著ê有日本時代1925年發生ê二林甘蔗事件，這是上頭先ê農民組織抗議，二林事件以後才有別位ê農民組合kah農民運動。其實tsit个所在tī荷蘭人ê時代就有紀載，二林是平埔Babuza族語，後來才用漢字寫，台語發音。本底遮是蹛平埔族人才對，大清時代開始有移民來遮，二林姓洪ê特別濟，當初是一个姓洪ê kah一个姓蕭ê好朋友做伙來台灣開墾，為著決定誰蹛佗位，in就決定逐人挖一碗沙去秤重，較重ê人ē使先揀。因為姓蕭ê偷吃步，tī沙內面摻粗鹽，所以就贏ah。伊揀beh蹛社頭，姓洪ê就蹛tī二林。這是寫tī二林鎮誌ê故事。竹圍仔就tī二林原斗庄ê西南爿，文章有寫著，ē號做竹圍仔就逐戶lóng有種刺竹仔。台灣叫做竹圍仔ê所在袂少，種刺竹圍起來，ē使遮風mā ē使做圍牆仔，預防別人走入來，竹仔猶ē使做建材iah是做家具，koh有經濟價值。

陳老師ê文章猶有寫二林三寶內面ê一項。二林是有佗三寶？甜麥（蕎麥）、紅薏仁kah葡萄。Tsit篇文章內就有寫著葡萄，作者寫，tī Phòng-phuh寮仔邊就ē看tio̍h人種葡萄，一款叫做「Go͘-lú-lián」ê品種，mā號做金香。金香葡萄ē來到二林是1970年代公賣局kā做葡萄酒的工廠徙來南投酒廠，m̄才kah附近ê農民拍契約，收葡萄，二林主要種金香，后里、外埔是種黑后。金香是做白葡萄酒，黑后做紅葡萄酒，因為是公賣局契作，所以收入較穩定，真濟人種。1997年公賣局無koh繼續拍契約，m̄-koh農民學ē曉家自己加工做酒，到今彰化ê葡萄酒產量猶是台灣第一，mā koh有1,848公頃ê葡萄。

路尾文章寫ê，uì車牌仔到竹圍仔彼條路是tī佗位？我看地圖看真久，無確定，本底想講去問老師較緊。M̄-koh我無問，應該是我家己去揣，mā留予聽友家己去揣較趣味。文章寫了誠詳細。作者落車ē先拄著水沖，紲落來ē看著phòng-phuh寮仔，寮仔邊是種葡萄，彼庄ê號做竹圍仔就是有袂少刺竹á，tsit-má變種麻竹仔較濟。伊mā寫著欲入庄內ē遇著雙叉路，一條uì庄內去，另外一條是沿溝仔墘經過塚仔埔。這是真正有tsit條路，有人去揣，去行過。等看彰化人、二林人敢khah緊揣ē著？我若照遮ê提示來看地圖，揣著ê m̄若是一條路，我m̄知彼台客運是行佗一條路，uì南爿kah uì北爿lóng有路thang入去竹圍仔庄，彼tah水圳、葡園萄、竹林仔、公墓lóng bē少，所以應該實際去看ē較清楚，ē使去看現場佮冊內寫ê景色敢有相仝。歇熱若有閒，這會使變做一个活動，逐家相招去二林揣看老師寫ê路線tī佗位。知影ê人來共我講，報予逐家知。

〈沿路搜揣囡仔時〉是1998年刊tī《台文BONG報》32期 ê 一篇文章，tsit篇真濟人讀過，是台文作品ê經典。Tsit篇文章有刊tī無仝ê所在，m̄-kò逐家若beh讀，建議去揣《拋荒ê故事》tsit套書。拋荒ê故事tsit套有6輯，總共36篇文章，內底是陳明仁老師寫伊ê故鄉，寫伊細漢時ê作品。〈沿路搜揣囡仔時〉tsit篇是收tī第4輯田莊囡仔紀事內面。Tsit套冊是特別編做讀本，逐篇文章有漢羅濫寫，mā有全漢字，tsit兩款書寫系統lóng有，逐家ē 使揀家己慣勢ê方式來讀。遮ê文章m̄是原本就有註解，陳明仁老師用ê詞彙有真濟是詞典查無ê。佇《拋荒ê故事》tsit這套書裡頭，有註解，而且有錄音thang聽。

今仔日kah後個月台語「冊內ê地景」tsit个單元lóng beh來介紹陳雷老師ê《鄉史補記》。Tsit本冊是陳雷老師uì 1998年寫到2004年。伊先寫東史才koh寫西史，「東史補記」是先有1篇短篇小說刊tī《台文通訊》，後來才改做長篇，變做tsit-má《鄉史補記》ê 1部分。2004年規部小說開始刊tī美國發行ê《公論報》，mā刊tī《台灣通訊》。2008年才真正出版。Tsit本冊寫ê是1786年林爽文事件了後，到1997年左右， tsit 200外年，真濟家族，真濟代人ê故事。

冊皮特別有寫講這是第一本台語ê歷史長篇小說，《鄉史補記》mā是頭1本以平埔族為主體，uì西拉雅人ê角度來敘事台灣200年來ê歷史。規本小說講 8个西拉雅家族先hōo清國、後來日本，紲落來hōo中國國民黨殖民ê經過，受著政治kah文化ê壓迫，按怎失去家己ê土地，家己ê族群kah文化。Tsit 8个家族in原本蹛tī佳里、學甲、將軍遐遐ê蕭壠社。In受著迫害就tī善化uì bih-á-kha彼位，順曾文溪，有人往東，有人往西兩爿搬徙，所以才分做西史kah東史補記。Tsit本冊就號做《鄉史補記》，因為小說寫ê是歷史課本，地方鄉誌、鎮誌無寫著ê歷史記事。

我今仔日先來講「西史補記」，話頭是leh說學甲公黃慶餘。黃慶餘是西拉雅人龜加kah阿米枝的囡仔，後來in老爸有1个漢名，伊mā uì毛龜義央換叫做黃慶餘。伊住細漢kah in老爸學做生理，koh學漢字mā學羅馬字。1擺tī路裡因為kā八卦會鬥相共，所以就入去鴉片行做穡，koh去官廳食頭路。 伊顧監ê時陣，uì李天送遐知影埋珠寶ê所在，阿餘uì內面提寡錢，就家己去做生意，結果去kheh糖趁著錢。學甲ê甘蔗濟，伊甘蔗廍ê糖也賣了好。拄著英國人tī廣東相戰ê時，伊koh共糖囤起來，戰爭結束hōo伊賣糖趁大錢，買真濟地 。因為算命ê講伊若有錢就無囝，結果伊本底有八个囡仔，suah 1个1个來過身，干焦賰1个。伊家己後來破病ê時，in母去問老母，才去拜西拉雅ê阿立祖，hōo伊好起來，伊ê囝mā才知影原來in是平埔族人。黃慶瑜是西史補記ê 1个主角，這是其中ê 1个故事。Tsit部小說講ê，m̄-nā是黃家，猶有真濟人物tī tsit 200年來按怎受著殖民ê打壓，失去家己ê語言、信仰、文化，後來koh按怎發現家己是平埔族人ê故事。 

過去寫台灣平埔族ê文章m̄是無，m̄過上最早若m̄是外國人，就是中國人leh描述in tī台灣看著的原住民。1970年代，1980年代ê本土運動kah原住民運動hōo 1寡作家mā發現家己平埔族ê血統，tī in leh思考台灣人認同ê時陣，也開始書寫西拉雅ê故事。特別是台語文學界有bē少，m̄過陳雷tsit本《鄉史補記》是頭1本uì平埔族人ê角度來看台灣ê發展，是以西拉雅人做中心，m̄是uì漢人ê角度來看台灣ê歷史。

因為這部小說較大部，我幾個月前就開始讀。拄開始讀ê時，我真正是sa lóng無。主要是1章讀了，反後1章，感覺nà ē koh是新ê人，新ê故事，kah進前ê故事是啥物牽連想lóng無。冊內有真濟人名，我是無去kā算，m̄-koh鄭雅老師ê碩士論文寫講內面有超過150个角色。bok莫怪冊ê上頭前幾頁有特別畫遮ê家族kah人物ê關係。頭幾張hōo我印象上深ê，是相拍、相刣ê部分，攏寫kah足趣味，真好看。M̄過我為tio̍h beh kā遐的故事湊起來，姑不而將開始kā逐章內面ê人物kah重點記落來。若有聽友捌讀過tsit本冊，有相共ê感想，我kā恁講，繼續讀到第4章開始，就是黃慶餘出世了後，所有ê線索都ē清楚，頭前講ê遐ê人物又koh ē出現，in ê關係ē變清楚，故事就湊ē起來矣。我看較捌了後，m̄-nā感覺真好看，mā了解是按怎這是一部台語文學ê經典。

陳雷老師kā 200冬來，tī tsit片土地發生ê歷史事件，lóng寫tī tsit本小說內底。Tī西史補記內面，有清國時代北洋頭抗租事件，日本人來ê時ê走番仔反，國民黨統治ê時陣，暗殺蔣經國ê事件kah後來發生ê美麗島事件。Tī東史補記內面是寫著內里社大屠殺，白色恐怖時期ê總統案kah黑名單。遮lóng是台灣人對抗殖民政府ê歷史事件。作者m̄-nā是tio̍h先知影遮ê歷史，是beh kā所有發生ê事件寫tī仝一部小說就無遐爾簡單。內面真詳細leh寫真濟往過ê文化風俗，特別是有寫著西拉雅文化kah信仰，像公廨，mā叫做三片壁，in leh拜ê阿立祖。M̄過阿立祖無像，是用ē使裝清水ê杆仔，甕仔來代表。公廨這陣猶看ē著。小說內面阿餘破病好了，beh感謝阿立祖，就kā公廨改作磚仔造ê廟，內面除了囥彿祖神像，也拜阿立祖。Tsit款拜阿立祖kah別个神明ê合壇mā有bē少。西拉雅信仰漢化ê過程，hōo公廨是那來那少。

小說除了寫連續三个外來政權按怎hōo西拉雅人失去家己ê文化，mā寫台灣經濟發展ê過程，uì樟腦、鴉片到kheh醣，甚至koh寫tī無仝時代，無仝ê甘蔗phōo ê演變，mā寫英國kah中國為著樟腦相仗對台灣經濟ê影響。陳雷老師也講過，伊是去圖書館揣古早地圖ê地名。小說內猶有出現西拉雅語。蕭láng社ê隘丁是到Bih-á-跤沿U-u溪，1陣人往西，1陣人往東走。「U-u」 tī西拉雅語是「倒轉去」ê意思，倒轉去ē使代表地理上踅1輪，mā ē使代表轉去厝揣著歸屬，找著家己ê意思。

雖罔m̄-nā 1个作者講過，in寫小說是為著beh kā台灣ê歷史講hōo koh較濟人知影，若是kā歷史變做故事，就會有koh較濟人對歷史人物kah發生ê代誌koh較了解。小說ē使kā1寡歷史筋骨，變做是有肉有血，有聲有影ê人kah過事，像我咱知影往過有番仔契，mā知影漢人霸佔原住民ê土地。M̄過番仔契按怎拍， 土地按怎hōo人霸占去，iah是西拉雅人按怎受著壓迫，tsit本小說有寫真詳細ê經過，有ê是女性hōo漢人強去，發生衝突；有ê是漢人koh靠外來政權來對付原住民，猶有真濟步數。小說hōo這个歷史變作是活跳ê人kah in發生ê代誌。Iah是西拉雅人後來按怎ē叫是家己是漢人，像黃慶餘ê後代mā掠準家己是uì中國移民來ê人，tsit款認同是按怎產生，看tsit本冊就ē較清楚。當然小說無的確lóng是真ê，tsit个打壓ê過程也的確有koh較濟方式是冊內無寫著ê，m̄過咱若去讀tsit部小說，咱ē對台灣ê了解koh較深，看待台灣歷史ê角度ē改變，ē較開闊。

平埔族是母系社會，tsit部小說mā是用女性來呈現台灣本底ê性別文化。內面mā是遮ê女性故事hōo我感覺真好看。上頭出現ê是包心，in老爸做隘丁，領無錢，伊去替in老爸討錢ê時陣，隘長beh kā伊戲弄，結果伊kā把隘長刣死。這mā是小說內底蕭lâng社tsit陣西拉雅人走去別位ê因端。包心m̄但勇敢，是1个身體mā足勇健ê女性。小說內面寫著伊真濟神奇ê事跡，包括伊tī北頭洋抗租事件ê時陣，是tshuā人去相戰ê勇士。而且包心koh足巧，去學讀漢字，mā學ē曉讀羅馬字寫ê西拉雅文，伊mā是後來教黃慶餘讀漢字kah羅馬字ê人。 

小說還有真濟个hōo人敬佩ê女性，阿suí 媽母 Mabutirat 是黃家ê查某祖，in兜土地hōo漢人霸佔了後，伊就賣hōo漢人做查某嫺，結果hōo人強去，15歲有身。他伊為著保護腹肚底ê囡仔，就偷走，tī路裡荒郊野外lóng無人ê所在家己生囝。生了用長草kā紅嬰仔縛hōo好，偝leh繼續行，後來才遇著in翁洪雞。猶有1个hōo我印象真深ê春仔。彼已經是戰後十外冬，1960年代ê時，in先生tī厝樓跤hōo兩个便衣警察攑槍彈死ê時陣，喝1聲「春仔」。伊tī樓頂聽著，趕緊kā 5歲ê囡仔抱leh就uì窗仔門跳落去。結果來1陣絞螺仔風，hōo in兩个飛起來，無摔死。後來都傳講春仔ē使tī天頂飛。

陳雷用平埔族kah漢人無仝ê性別文化kah女性ê角色 ，來典現台灣人ê無仝，tī冊內ê女性是晟養囡仔，保護囡仔，mā是傳承語言kah文化ê主角。有關tsit部分鄭雅怡老師ê碩士論文《陳雷作品ê去殖民精神--以鄉史補記做中心》，有真好ê分析，逐家ē使去揣來看。猶有，tsit个拜六，台文博覽會有辦1場線頂ê講座《陳雷kap 1990年代ê海外台語文運動起鼓》， 內面有陳雷、鄭良光、張秀滿、蘇正玄老師。就tī拜六7/26暗時10點，欲參加ê，請tī線頂揣「台文博覽會」就有活動ê連結。

後個月ê台語冊內ê地景tsit个單元，我ē繼續來講東史補記kah小說內ê地理地景。舊年「陳雷台語文學讀冊會」kah陳文德先生，in有實際去冊內寫ê地點行踏，我後擺ē介紹。

《鄉史補記》講一陣蕭隆社Siraya人受迫害，離開故鄉，一陣人往西，一群人往東走受著三擺外來政權迫害ê台灣歷史。這部小說分做〈西史補記〉kah〈東史補記〉。進前講過〈西史補記〉，今仔日咱來講〈東史補記〉。 

〈東史補記〉kah西史相𫝛mā是真濟人ê故事，m̄過我今仔日來講，內面主要ê人物，泰雄kah in阿爸寶仔。〈東史補記〉ê第1章是uì高雄美麗鄉匏仔寮開始。若是坐高雄ê甲仙快線，內面有一站叫做匏子寮。Tī遐有一个人叫做朱寶，時間已經來到1950年代。彼當陣寶仔覕tī壁堵內底，伊ê牽手ē逐工提物件hōo伊食。伊是按怎覕tī壁堵內？因為有一暗伊kah朋友去啉酒，講著往過算命ê講，伊74歲ē做總統。規陣朋友kah伊講耍笑。連鞭講，肖豬ê ē做總統，連鞭講，人總統lóng是用選ê。結果這陣人tō hōo警察掠去關，寶仔為著覕警察，tō覕tī壁裡，一直到有抓耙子去kā伊騙出來自首，伊就hōo人掠去關佇火燒島。

寶仔ê後生就是泰雄，是庄內上gâu讀冊ê囡仔。伊第一名考牢台南師範學校， m̄過因為老爸是政治犯，hōo人派轉來山區ê學校教冊。泰雄一直lóng看袂起山區ê原住民囡仔。後來知影in阿姐春仔beh kah原住民結婚是足反對，tī beh生囡仔ê時陣koh一直喊講，bē見笑，beh生番仔囝。若beh講歧視原住民，泰雄tī冊內應該排佇足頭前。是無讀書去趁錢hōo小弟讀冊ê春仔願意kah泰雄講ê番仔結婚，受過教育，受過中華民族意識洗腦ê泰雄才是ē歧視本來就蹛tī台灣ê人。

M̄過泰雄有一工去揣伊ê姨婆祖，才知影in老母水粉就是Siraya人ê後代，就是uì西爿予漢人趕來遮ê。伊koh看著日本時代ê戶口簿仔才知影伊ê祖先彼時是hōo人登記做「熟」番。仝一个時陣，泰雄ê學校來一个生甲足媠ê老師，泰雄足佮意伊。去到in兜，才知影in就是猶有保留Siraya文化ê原住民。泰雄也改變伊對原住民ê看法，兩人結婚生囝，煞落來猶有濟濟ê故事。

冊內底ê總統案講寶仔覕tī壁裡是真正發生過ê代誌。新竹有一个叫做施儒珍ê人，伊自新竹公學校出業，去宜蘭農業學校讀冊，tī白色恐怖ê年代，就hōo人當作共匪仔逐。I四界覕，後來是in兜ê人加起一堵壁，壁kah壁中央留二尺闊hōo伊ē使倒落來歇睏，外面囥寡物件khàm leh。伊日時lóng覕tī內底，下晡in小弟ē tshuā伊出來活動，按呢過18年。因為警察一直leh揣伊，所以in厝內ê人，爸母，小弟lóng受到\著凌峙，是一个真悲慘ê事件。後來ê人知道施儒珍這个事件，猶kā伊改編做電影，電視劇。陳雷老師ê小說寫寶仔覕tī壁裡，應該mā是uì這个事件來ê。

〈東史補記〉也有詳細寫著漢人按怎霸佔Siraya人ê土地。自往過ê經驗，Siraya人也知影tio̍h防Láu-á，in無kohhōo漢人入來蹛，mā無愛租地hōo讓漢人種作。鄭水就是一个無飯thang食ê羅漢腳，伊來到烏山嶺ê二社遐，Siraya人hōo伊食hōo伊蹛。伊為著beh留落來就講家己mā是Siraya人，tī遐娶某，koh想beh愛遐ê地，就聯合外口ê漢人來搶土地。結果害本來蹛tī遐ê人koh往東走。眉仔tshuā囡仔搬過烏山嶺koh遼過後崛溪，才來到楠梓仙溪hōo人救起來。冊裡漢人beh搶原住民ê地猶有一招，大清國講ê理番政策，有一步就是管理西拉雅人ê出入，mài hōo koh較濟人入去社寮。本底道偆無偌濟êSiraya人自然愈來愈少，漢人無刣無搶，原住民就沓沓仔無去矣。

小說若uì頭讀到〈東史補記〉真濟代誌tō ē交代較清楚。泰雄ê姨婆祖畚箕ē kā Siraya人按怎走來到東部，就是頭前冊寫ê經過全部整理講一改。Tī〈東史補記〉內面ê畚箕也ē交代在tī西史內面無頭koh ē飛ê查埔人是誰。西史寫講，當春仔uì樓頂抱囡仔跳落來ê時就看著一个查捕人，tī天頂leh飛，無頭，穿桶裙，攑一支薰吹，koh tshuā一隻黑狗，kā伊講「飛ah，飛ah，你會飛」。這个神秘ê人物，路尾手，畚箕mā有講hōo in聽，原來這个就是in ê祖先，Siraya ê社頭，叫做目肚，是tī 內裡社事件hōo人殺刣死，ē不時出來保護in ê囝孫。Kah西史內底，後來漢名號做賴蔥ê包心相仝，畚箕就是彼个kā Siraya記憶kah文化傳hōo後代ê女性。伊ē講Siraya語，ē唱Siraya ê詩歌，靠伊kā泰雄講in祖先ê故事，mā教泰雄ê某仔囝唱Siraya ê歌。

若講西史內面有真濟勇敢保護紅嬰仔，抱嬰仔逃命ê女性，東史內面有兩个想家己ê囡仔，想甲起痟ê女性。一个是金枝，伊tī查某間討食，想beh生一个囡仔thang嫁人，離開遐。M̄過囡仔ê老爸已經有娶某，所以伊毋知ê時，別人提落胎藥仔hōo伊食。伊起痟，轉去in老爸老母ê厝，後來啉農藥自殺。另外一个是春風，春風足想beh有囡仔，結婚三冬lóng無生，結果是in翁做大水ê時死去了後，伊才有身，結果紅嬰仔生落來就hōo產婆抱走。這款故事往過應該袂少，陳雷老師家in寫入去小說。Uì 遮ē應看出女性beh生iah是無beh生囝，lóng m̄是in家己ē使決定ê。

小說後面猶有一个kah ē飛ê春仔相仝，hōo我印象足深ê, 就是無肚臍ê秀姑。故事講秀姑自出世就無肚臍，伊為著beh有肚臍就去問長老，結果長老仆落去kā伊拜 。長老講，伊就是彼个無袂記得家己是蛇ê排灣族人。往過大武山有真濟百步蛇，創造者hōo蛇兩隻手、兩隻腳，hōo in ē使行路拍獵，無做肚臍，是beh hōo in ē記得家己是蛇。M̄過後來百步蛇開始ē走，ē做代誌ê時，就離開大武山，也有人生肚臍袂記得家己是百步蛇。秀姑無肚臍就代表伊無袂記得是uì大武山來ê。長老koh交代伊m̄ thang袂記得這層代誌。M̄過真gâu唱歌ê秀姑變做歌星了後，綴人時行，為著beh穿露肚臍ê衫就去做一个假肚臍。真緊歌就唱袂好，伊koh轉去揣長老ê時，長老真失望kā伊講「你唱ê歌已經死去，mā袂應得轉去大武山矣。」 

小說內面ē講著灣裡溪，加拔溪，U-u溪，其實往過曾文溪猶m̄是號做曾文溪。按大清國ê時諸羅縣志ê記載，是頂面到大內叫做「灣裏溪」，往西到蕭壠tsit段叫做「加拔溪」，經過蕭壠流入海裡這段號做「漚汪溪」。進前講說青瞑蛇做大水ê時陣有講著曾文溪改道，無koh經過漚汪，舊ê河道成做斷頭河，tsit馬叫做將軍溪。曾文溪ê名有無共講法一个是說荷蘭人ê時代，有一个叫做「曾文」ê人tī溪邊開墾，所以叫做曾文。另外一个講法是溪水改道，有tī溪頂做一个真重要ê渡口「罾門渡」，灣裏溪就改叫做罾門溪。後來koh變做「曾文溪」。

紲落來是tsit本冊寫ê所在到底tī佗位？Siraya人uì佳里，koh來善化西堡，篾仔跤沿U-u溪、灣里溪到加根紗，也有一陣人往東先記到山腳，玉井， Ta-pa-nî，後來行過高雄楠梓仙溪，Lāu-lông-khe 往東去。 

有ê，冊內ē特別解說遐ê古早ê地名是tī佗位，像加根砂就是tsit-má ê番仔寮，iah是包心刣死隘長，hōo八个家族開始走去覕ê所在叫做篾仔跤，冊內mā有寫講sī tī tsit-má ê大內。若看地圖應該tsit陣寫埤仔腳。M̄過冊內時間交葛，ē寫著無共時代用ê地名，所以舊年舉辦陳雷文學節ê時陣，有一个真重要ê活動kah事工，in有去行踏tsit寡地點，koh有記錄落來。逐家若是去線頂揣《落台語--瑞士台語社》tō看ē著，mā有地圖ê鍊仔。除了相片猶有in tī現場讀這本小說ê錄影。Tsit截路猶有袂少公廨，政府有出錢整理作紀念ê地點，有北頭洋文化園區。這個北頭 kah台北ê北投lóng相仝是尪姨ê意思‧另外一個地點是玉井 ê Tapani紀念公園。這ê地點因為無偌濟經費，所以無法度起甲偌好，所以去參觀ê人mā無濟。若是ē使kā 較濟Siraya文化ê地點，做koh較好，hōo koh較濟人去講遮ê故事，就ē有較濟人知影台灣祖先ê歷史。

復活的人是胡長松老師用五年外ê時間寫ê長篇小說，總共有30外萬字。Tsit本冊是2014年出版，隔冬也提著吳三連文學獎。

Tsit本小說講一个40外歲ê公務人員，葉國典，伊為著逃避hōo家己丈人陷害ê官司，就假死變做無身分ê人，走去別个所在覕，煞hōo一个失智ê老大人叫是伊家己無無去ê後sen江文達，就kā伊𤆬轉去厝蹛。 因為伊kah江文達相仝，頭殼額lóng有一个像金龜仔ê胎記。葉國典去蹛文達厝ê時看著江文達寫hōo李春岫情批，伊就想欲了解in兩人發生ê代誌，走去熟似李春岫，koh kah伊做伙去揣失蹤ê江文達。Tī tsit个過程當中，葉國典揣著伊家己平埔族ê身分認同，也揣著家己ê信仰 。葉國典捌講：「江文達的性命是有實體的，飽滇的湖水，閣會使反射天地的媠，毋過我的性命是虛的，除了白白一片，啥物攏毋是。」(339頁)

冊內ē用「旋轉的人」，「翻轉的人」，lóng是改變、換新ê意思。「復活的人」是後來才囥起去ê冊名，意思是主角葉國典kā漢文化ê印記提掉，揣著家己ê根，也有新ê宗教信仰，變做新ê一个人。

小說ê背景是1990年代ê學生運動，後來ê環境運動ê抗議，kah有真濟社會事件發生ê台灣。冊內mā寫平埔族內面ê馬卡道人、西拉雅人，𪜶自細漢拄著ê歧視，生活中遇著ê苦難。做社會底層ê工課，庄內兩ê上gâu讀冊ê少年人去讀大學，去參加學生運動， 參加環保運動。路尾江文達失蹤去，kah伊同鄉ê，mā參加社會運動ê潘水亞，十外年後tī伊ê故鄉種王梨。雖罔土地已經hōo王梨公司買去，m̄過伊koh kā地租轉來種作，顧彼片自古早就是𪜶 leh生活ê田園。冊內寫伊是有「戰鬥性」，伊講 「毋管敢是用國家的名義𪜶攏是仝一種物，仝一種剝削咱生存的癩哥物。化工廠，財團，政府，法官，學者，特務，攏是一體。」（237頁）。 伊講這是伊自1990年參加學生運動kah環保運動了，得著ê結論。小說詳細描述90年代帶領台灣民主化ê社會運動，也寫遮ê運動並無hōo社會中所有弱勢ê人lóng得著公平ê待遇。

冊內有真濟西拉雅語，有真媠ê西拉雅風景，冊內也寫平埔族ê傳統祭典kah袂少傳說，也有說著庄內人拿提換米ê故事，用冬天kah欠缺換春天kah飽滿。 

我今仔日ē先講小說ê前半部，寫tī情批內面，影響葉國典ê江文達kah李春岫ê故事。後個月才來講葉國典伊本身。按照批內寫ê，江文達kah李春岫是tī野百合運動抗議ê現場遇著。李春岫是tī七層嶺教會大漢ê西拉雅人，參加長老tshuā ê讀冊會hōo伊決心大漢beh做新聞記者，所以考入大學ê新聞系。伊讀中學ê時hām一个查埔同學真好，m̄過彼个同學ê老母無佮意伊，因為伊ê身份。 

江文達是蹛tī山跤ê馬卡道人，知影家己ê祖先是uì港喙仔hōo人趕來大武山腳。伊mā是大學生，kah仝庄ê潘水亞做伙去參加學生運動。遮ê批誠詳細交代彼時學生運動ê訴求，in按怎beh揀野百合當作運動ê象徵。

批內江文達家己講因為李春佑hōo伊變做一个翻轉ê人，也koh較熟似家己ê厝kah故鄉。伊寫講，李春岫就像伊故鄉ê傳說內面ê天使 Uma。Uma 生了誠媠，而且會使kā去到水潭邊ê受傷iah是中毒ê查捕人救活。

伊真佮意李春岫，m̄過李春岫已經有一个leh在交往ê查埔朋友，就是𪜶學校ê教授S。 S是政治系ê教授。In阿叔是228受難者，m̄過伊ê老爸為著家族利益加入國民黨，後來發展了誠好。 S留學ê時，參加K黨ê外圍組織 ，猶袂提著學位就有大學教授ê缺leh等伊。 伊ê發展也真合彼个白色恐怖ê年代，真濟人kah人ê關係受著政治操作。伊留學ê時，就hōo人要求做抓耙仔，為著tsit層代誌伊koh kah𪜶老爸冤家。轉來台灣，伊一个同窗死tī大學內底，頂面要求伊tio̍h出來講，彼暗死去ê同窗是kah伊做伙食飯，iah無就beh kā伊tī美國留學做ê歹代lóngiah-iah出來。伊估不而將就按呢做，後來就退黨。紲落來就開始以228受難者家屬出現tī學生ê面頭前。Tsit个S教授後來koh去做官。伊tī上課ê時ē講自由主義kah民主和平，m̄過mā會去妓女間，已經結婚猶koh去逐伊ê學生李春岫， 後來李春佑koh為著伊kā一个囡仔提掉。 江文達kah S教授也因為李春岫起衝突。 

作家leh寫冊是去揣真濟資料，內容真濟是uì真正ê人kah事件編寫出來ê。 Tsit个S教授mā是，伊反映ê是一个特殊ê年代，一寡台灣人ê經歷。我印象足深ê是小說寫，後來江文達發見S就是一個「自在」ê人，這个教授leh講ê自由主義iah是別ê理論lóng是為著保護每一个人ê自在，上主要ê，是伊家己ê自在 。

講轉來江文達，1990年代ê社會運動真濟，伊去參加環保運動，抗議化工廠汙染，油罐車偷倒油，抗議到尾變做hōo人跟蹤，有人講他落尾ē失蹤，就是hōo黑道掠去。Kah伊做伙抗議ê潘水亞也看破，轉去故鄉顧彼片王梨園。

《復活ê人》tsit本冊是十冬前，2014年，草根出版。胡長松是真早就開始寫小說 。Tsit本冊寫ê，有部分是伊leh走揣家己ê祖先ê過程所讀著ê資料，所聽著ê故事。伊講𪜶兜有幾nā代ê族譜，煞揣無大清時代ê資料，感覺真奇怪，後來才知影in兜ê人本來是住tī舊城ê馬卡道人。 

平埔族內面ê馬卡道人、西拉雅人kah大武龍族算是親戚。馬卡道人本底蹛tī打狗社，後來是hōo漢人趕，土地無去，遷去較南爿ê放索社。後來去到屏東東港林仔邊、枋寮遐。冊內寫ê地點就是大武山腳。故事內面寫平埔族人uì1990年到2010年左右，這段時間所拄著ê代誌，所以除了抗議化工廠，也有說著陳雲林來台灣，八八風災遮ê新聞。

Chit本冊寫ê是真媠ê西拉雅風景，有水沖，有溪邊ê水潭，有落花ê胭脂樹，遮ê些景緻lóng寫甲真幼路，無論是江文達經過ê路，還是後來葉國典行過ê路線，lóng有講著遐ê王梨園。屏東ê沿山公路，就是大武山邊ê彼條大路有台灣上大片ê王梨產區。Tsit條路uì枋寮開始，往北經過萬巒、內埔一直到高樹，伊ê兩旁，山邊kah真濟石頭ê平地，種有差不多3000公頃ê王梨。別ê所在若是一个園有10公頃就算袂少，遮真濟lóng超過，潘水亞ê園地就有20公頃。冊裡講遮ê王梨園真濟lóng是仝一間王梨公司買去了後，koh再租hōo原住民種作。

胡長松老師真早就開始寫作，伊寫詩mā寫小說。1998年出版華語小說《柴山少年安魂曲》，伊ê頭一本台文小說《燈塔下》是2005年出版，到今伊已經出版真濟本台語小說。伊tī 2001年參與《台語ê文藝》。2005年底發起《臺文戰線》，tsit-má 是台文戰線雜誌社ê社長。伊出版ê作品tī後一期ê電子報ē介紹。下個月冊內ê地景會繼續來講tsit本小說ê主角，葉國典kah他行過ê所在。

頂個月講《復活的人》tsit本冊，主要講冊裡hōo葉國典復活ê江文達、李春岫kap hōo我印象真深，聚集真濟政治人物做伙tī身軀頂ê 教授S；mā講冊內西拉雅ê地景。

今仔日我beh來講tsit本冊ê主角葉國典kah伊ê故事。

葉國典hōo人陷害，伊就假死，躲覕去南部大武山跤馬卡道人ê聚落。伊去蹛佇江文達ê厝，透過批信kah別人ê講ê，沓沓仔識似失蹤ê江文達。江文達是一个有理想，有行動，會思考ê人，伊變做葉國典走揣ê一个模範。

冊裡ê安排hōo好人kah歹人分kah誠清楚，至少壞人是誰是誠明顯。好額人、有權勢ê人、想beh用資金和kah權勢去騙koh較濟土地，破壞原住民生活環境、歧視別人文化ê人。遮ê人是tī台灣推捒中華文化，支持漢人統治ê人。這m̄是一个、兩个人，是一个社會整個ê結構kah組織。Uì葉國典ê丈人，伊ê的太太，大學ê教授，法官，土地開發公司，化工工廠到黑道，lóng縛做一綰，in lóng總是。In變做是迫害平埔族人ê一个集體。In欺負kah剝削ê對象包括葉國典。這層代誌是葉國典後來漸漸仔發見，也是伊選擇換一个身分，轉去伊ê故鄉ê原因。 

冊裡ê歹人按怎變做歹人是無交代，m̄過冊內真詳細leh交代葉國典是按怎反轉，uì 一个「半石人」變成真正ê人。「半石人」是聚落ê故事，講tī在七層嶺有三个兄弟仔去 打獵。庄內ê人lóng共in講，有一个叫做Rauwa界ê所在，若繼續向西行，就真危險。結果in ê大漢兄哥m̄相信，就叫兩个小弟leh，伊家己先去看覓。結果兩个小弟等無人，去揣，看tio̍h in ê大兄tī路邊ê 刺竹仔腳變做一个半人半石ê怪物，這就是半石人。 

葉國典聽著tsit个故事tō知影家己親像彼个半石人。伊寫hōo李春岫ê批講 「我想欲走揣一个新的人生故事，我一定會振作起來。我會繼續讀約瑟，而且，江文達已經提供我一个對離鄉个半石人翻轉來真實个人的可能路程 」（頁471）。

這本冊內ê葉國典一直leh問家己是誰？家己leh揣啥物？家己leh創啥物？伊猶koh ē足詳細分析家己，揣欲按怎改變家己。 像他出身tī南部一个地名叫做「番仔厝」ê所在，tī遐m̄但散食，koh hōo人講是烏番，所以伊一直想beh離開故鄉。伊去北部讀大學識似一个外省人ê查某囝，kā伊當作女神誠佮意，因為彼个人講標準ê華語，ē彈鋼琴，代表社會高層、有文化ê人。他結婚了，就留tī台北kah in丈人蹛。伊ê丈人koh替伊tī公家機關揣著頭路。對少年ê葉國典來講，台北ê城市、伊ê的牽手，丈人ê身分地位lóng是伊少年ê時，leh揣ê文明社會。後來伊才發見，伊ē按呢想是因為他往過對家己ê出身、家己ê故鄉感覺歹勢，是伊家己ê自卑感傷重。

因為出身無仝，結婚了後，葉國典tō感受著伊ê丈人看伊無起，連in太太mā是。葉國典一直lóng放袂落心ê是，結婚了in某有身suah堅持beh kā囡仔提掉，因為in某是大公司ê主管無時間thang顧囡仔。這層事hōo葉國典真失望，m̄過當伊假死失蹤了後，in某suah beh去kah別人結婚生囝。這種種lóng hōo葉國典對伊家己ê過去感覺見笑。伊往過beh離開故鄉，離開伊本底ê家庭，想beh變做另外一个有成就ê人，結果suah變成按呢，hōo伊受著真大ê打擊，mā hōo伊知影tio̍h-ài揣著家己。

若是講江文達ê情批，hōo葉國典開始想beh揣著家己失去ê彼部分，葉國典本底經歷過ê代誌，kah對一切ê失望，hōo伊koh較想beh揣著轉去家己故鄉ê路。 

除了對家己文化、身分認同，uì漢文化變做西拉雅文化ê反轉，復活ê人猶有另外一項反轉，就是信仰。因為李春岫，所以葉國典接觸著山頂ê教會，牧師kah聖經kā伊講啥物是愛，hōo伊uì一般社會追求成功kah利益ê價值觀翻轉，變做悔改、向望得救ê基督徒。葉國典kā李春岫講伊會繼續讀約瑟。約瑟就是希伯來人去外邦ê故事。約瑟hōo伊ê兄哥陷害，賣去外邦，埃及，做奴隸，後來koh hōo人陷害坐監。因為伊會解夢這个能力hōo人發現，伊替法老王解說眠夢koh誠準，就變做埃及ê宰相。紲落來伊koh遇著陷害伊ê哥哥，伊無繼續留tī埃及，選擇變轉來希伯來人ê身分，離開埃及。這也是一个人離開故鄉tī外邦生活koh轉去家己故鄉ê故事。

冊內ê女主角西拉雅人，李春岫是冊裡ê女神，伊帶領讀大學ê江文達，後來葉國典去找李春岫ê時，伊tī七層嶺教會做幹事，成立「百合之家」，幫助受折磨、受難ê女性。伊也是幫助葉國典揣著家己平埔族認同ê人。李春岫是自tī七層嶺ê時陣tō知影媒體ê力量，下決心beh變做記者，後來參加學生運動，koh轉去故鄉幫助聚落內底ê人。伊mā有受著漢文化ê壓迫，m̄過m̄捌反背家己ê故鄉kah文化，koh盡力leh保護族人kah保存西拉雅文化ê女性。小說路尾是葉國典脫離過去變做新ê一个人，也轉去揣李春岫，in兩人穿西拉雅傳統服裝參加朋友舉辦ê傳統婚禮。

這部小說leh講現代ê原住民tī都市、tī故鄉ê生活經驗，也寫著真濟西拉雅ê傳說kah日本時代ê歷史事件。作者研究馬卡道人uì鳳山hōo漢人趕，遷徙到屏東ê歷史，也透過冊內ê人物kā遮ê故事講出來。伊寫馬雅各kah李庥牧師tī南部起教會傳教，伊也寫日本時代隘丁團替農民去kah會社談收甘蔗ê錢，為tio̍h對抗日本警察，隘丁練宋江陣。

Kah陳雷先生寫ê《鄉史補記》相仝，《復活的人》是leh講家己認為是漢人ê台灣人，按怎揣著平埔族ê自我認同kah了解過去ê台灣歷史。In對台灣遮爾濟冬來hōo人教育做漢人ê意識感覺厭𤺪koh決心想beh揣著新ê身分。Tsit兩部小說ê時間背景無相仝，《復活的人》寫ê是1990年代ê事件，m̄但寫著野百合運動，環保運動，也寫著財團按怎來搶土地。像山跤ê土地政府beh畫作大學用地，財團beh來買地，地主m̄賣，為著保留土地koh tshuā人去行踏，識似彼片土地，結果suah予人kā工業廢土lóng倒tī彼那塊地。對kah作者相仝年紀，這陣四五十歲ê人來講，這攏是捌tī新聞看過，捌聽過，捌參與ê代誌。

頂個月彼集講ê是大武山跤鳳梨田kah西拉雅ê地景。今仔日我來講葉國典轉去台北ê時，kah西拉雅風景對照ê都市地景。小說描寫伊kah in蹛tī溪ê岸邊。彼條溪對草山落來，是基隆溪ê一條分支。伊寫講蹛遐ê人lóng是大官kah醫生。遐四箍輾轉有兩間大學。溪邊步岸不時有人leh散步、運動。M̄過伊寫講，tī遐運動ê人lóng是苦瓜面，伊寫「 看著並無歡喜，自較早就是按呢矣，怹連運動都有急欲爭取健康的目的性，這个目的性予怹的面假若硩佇一塊烏色的帆布下底；甚至彼个有錢閣嚴硬个老歲仔除了想欲受人尊敬的漚面，嘛揣袂出有啥物快樂的元素。」（頁483）。這是伊對台北市內人ê描寫。

《復活的人》真好看，有故事，有足幼路ê觀察，有真深ê反省kah思考，koh是一部ē帶hōo逐家向望kah未來ê小說。今年台語冊內ê地景，tsit个系列介紹六位作家ê六本冊。《復活的人》已經是第五本，tsit个系列感謝文化部今年度文學閱讀推廣計畫ê補助。我也特別揀tsit幾本，這陣tī市面上猶買ē tio̍h ê台語冊介紹hōo逐家，請逐家去交關。

2018年《等路》chit本華語小說出版。這是洪明道老師ê頭一本冊，隔轉冬tsit本冊就提著台灣文學獎ê金典獎kah蓓蕾獎，相仝彼冬mā tio̍h金鼎獎。Tsit本華語冊內直直有真濟台語語詞kah對話。後來洪明道家己揀幾篇翻寫做台文koh再出版。我今仔日主要beh講〈路竹的洪小姐〉這篇。不過我先來簡單介紹這本短篇小說集。

本底華語出版ê時是有9篇小說。台語版是uì內底揀5篇koh加添一篇〈巖仔〉，總共6篇，2021年，九歌出版。Tsit本內底寫這馬高雄kah台南ê隔界彼tah ê人，in ê生活kah in ê故事。

台語版ê頭篇〈村長伯的奮鬥〉講一个村長ê秘密，欲選舉ê時按怎來罨蓋。〈虱目魚栽〉寫飼魚仔ê人kap來台灣結婚ê新住民。〈巖仔〉是寫一个大腹肚、有身生囝ê尼姑。〈等鷺〉是講一個對抗地方開發ê環保人士，後來干焦ē使逐冬去等看黑面撓杯棓。第5篇〈Siat-tsuh〉是寫一个反抗爸母安排ê婚姻，離家出走koh轉來照顧老爸ê女性同志。

上路尾一篇是我今仔日beh介紹ê〈路竹的洪小姐〉。這篇寫洪小姐臭耳聾，講話袂清楚。伊會變做按呢是細漢時，in小弟破病誠久，伊揹in小弟去台南揣醫生，結果mā 予uè著，做伙lóng變做臭耳聾。洪小姐ê老爸本底請人kā伊做媒人，m̄過洪小姐suah tī伊食頭路ê飼料廠熟似一个查埔人，kah 人跑。出去四五冬，才koh轉來路竹ê厝裡。In兜算有傢伙，所以洪小姐就蹛厝裡，買菜煮飯，照顧in老爸。就這樣koh過十冬，洪小姐拄著一个來推銷洗碗精，kah伊相仝臭耳聾ê查埔人。彼个人走了，伊就喊in孫仔tshuā伊去辦一支手機仔，不時用line  kah對方聯絡，一直到對方寫批kā伊講beh搬去桃園，請她匯錢去鬥相共。洪小姐koh包袱仔款款leh，去車頭beh坐火車去桃園揣彼个人。故事停tī洪小姐去到車頭，回想伊十冬前mā是坐火車對人走ê時陣，伊家己mā無確定這馬手提ê桃園住址敢是真ê，m̄過伊猶是peh去車頂，看火車ē kā伊載去佗位？

臭耳聾ê洪小姐是一个善良ê人，in兜兄弟姊妹真濟个，in小弟破病，干焦伊會偷偷仔kā in小弟偝去台南揣醫生。伊tī車頭等車ê時，頭殼底猶leh煩惱in阿爸m̄捌揤過洗衣機，袂曉洗衫，衫無人洗，厝內無人款beh按怎。

Kah「冊內ê地景」頭前講ê幾本小說lóng無相仝，洪明道寫ê小說無教示，無明顯ê訊息，特別是講到尾，結局mā留真濟空間hōo讀者家己去想。洪小姐敢若有坐去往北的火車頂，也kài成無。in老爸敢有逐著伊？伊是去佗位？遮ê問題lóng無遐爾重要。規篇小說是kā洪小姐做一个聽無koh袂啥會曉講話ê人，伊逐工遇著ê困難，寫甲足詳細。伊kah遮ê人，遐ê人按怎接接，有啥物交插，伊按怎lóng無法度完全表達伊ê意思予人知，這款無法度kah人對話ê稀微是寫kah誠明顯。

 洪小姐beh去拍車票進前是有練習真濟工，beh kā地點講hōo明，m̄過賣票ê洪喜郎猶是聽不懂伊beh去佗位。作者寫講

「排隊是愈排愈長矣。有捾菜籃仔的，嘛有穿甲pha-lih-pha-lih的移工。洪喜郎予踏塗跤的聲逼甲真著急。伊請洪小姐到後面小等咧，洪小姐吐一口大氣。

拍幾張到高雄的票了後，伊行去資料疊甲懸懸的桌仔，抽一張台灣省地圖出來。『欲去佗位！』洪喜郎的聲和洪小姐仝步起來。洪小姐共目鏡剝起來，目睭眵做一條線袂輸貓仔。」（184頁）

洪小姐無聽著，講話袂清，伊寫字誠媠，講ê是台語。伊lóng會去麥當勞坐，m̄過伊m̄知薯條、cola、漢堡的台語按怎講，遐的少年店員koh聽無伊是leh講啥，見擺點物件lóng跤狂手亂。

過年時，伊ê兄弟姊妹真濟人ē轉來食飯，伊準備紙beh寫kah人開講，m̄過無人beh去看伊leh寫啥。伊捌beh去外面稅厝，m̄過敲電話去，話講袂清楚，tō算去看厝，伊無翁無頭路，mā無人beh共厝稅hōo伊。伊kah孫仔去辦手機仔，孫仔聽無伊是beh傳line，替伊揀一支袂當用網路，免錢ê機仔。手機仔hōo伊ē使寫字kah別人連絡、開講，m̄過伊家己也懷疑過這款新ê科技，無看著人，無聽著聲，干焦用寫ê，敢會hōo人騙去。

伊tī路竹ê孤單hōo伊，tō算是hōo人騙，mā是beh閣坐火車離開遐。洪明道寫ê人物lóng kah洪小姐相仝，lóng想beh離開故鄉，koh誠猶豫。伊寫ê女性主角lóng ē反抗，特別是反抗厝內婚姻安排，m̄過mā lóng是繼續leh照顧厝內ê人。 

做一个作家，洪老師寫ê人物ū真坐款身分，有政治人物，有環保人士，有新住民，有女性同志。這本台語ê《等路》6篇小說tō有 3篇leh寫女性。這除了有真好ê觀察，tio̍h了解逐个人，uì in ê處境來設想，才有辦法寫kah遮爾幼路。洪明道老師寫遮ê人物，描寫ê方式是lóng有距離，真濟是用第三者ê角度，真詳細，無帶情緒leh描寫發生ê代誌，伊留hōo讀者家己去解釋伊看著ê。

Uì冊內ê內容mā看ē出作者對家己故鄉環境的感受。等路內面ê背景sī洪明道老師的故鄉，小說內面寫ê，有聲、有影、koh有氣味，伊寫講：

「彼一日，舊透天厝的玻璃門無關，南國的空氣袂傷冷，日頭共風烘燒了後，透過網仔門送入來。光線恬恬the 佇洪小姐的裙頂，只有園仔內的弓蕉樹佇咧嗤嗤呲呲。」（179頁）

洪老師mā會足清楚寫出物理空間，厝內家具按怎囥，櫥仔頂排啥物，伊ē足詳細寫路裡看著ê，hōo m̄捌去過路竹ê人mā想會出彼ê所在生做啥款。伊寫洪小姐騎oo-tó-bái，伊「經過老診所、金香行、棺柴店，閣有這馬偆空地仔的舊菜市，接到日本人開ê彼條產業道路。紲落來到一个欲九十度的轉斡路，共方向攏舞甲規个東倒西歪，火車頭就徛佇彎路中央。」（179頁）

路竹是一个真有歷史ê所在，tī荷蘭人時代tō有記載。1764年的鳳山縣志就有寫到半路竹，是在鳳山和安平的半路，有很多竹子，可能經過的人會在那裏休息所以叫做半路竹。嘛有人講「半路」是指平埔族tapuyen社的路程，所以半路竹是平埔族語。也有人講「半」是因為竹林足濟，真歹行所以叫「絆路竹」。日本人kā半提掉就偆路竹這个名。

這陣ê路竹有四寶，一个是甘仔蜜、一个是花菜、koh來是雞卵kah虱目魚。〈路竹的洪小姐〉這篇有寫車站後面ê飼料廠，往過洪小姐食頭路ê所在變做雞寮，冊內也寫著雞卵那生，錢就那濟。

這位有一个歷史人物，黃溫恭，是路竹地區的首位牙醫師。黃溫恭返台目睹台灣經濟的惡化，kah建中ê校長陳文彬組讀書會，教讀左派ê冊。1952年伊自首了，hōo人判15冬，結果蔣介石kā伊判死刑。伊m̄捌看著ê查某囝黃春蘭今年才出一本冊， 黃春蘭的逆襲人生：遲來的遺書，寫in老爸kah伊ê故事。黃溫恭過身了，伊ê牽手楊清蓮leh教冊，為著hōo囡仔較好ê環境，搬去台南，m̄過工課無法度調去台南，所以逐工tō對台南到路竹通勤，家己飼三个囡仔。這个故事tī華語版ê等路有寫著。

這本冊誠好看，作者用真清楚ê目睭去觀察四周圍環境， 用誠開闊ê心去理解人ê世界，才 koh用伊誠好ê文筆寫出來hōo人知，hōo咱知影四界看起來袂輸白汫無味ê人kah生活，其實逐个人、逐个所在lóng有無四常ê故事。

洪明道老師是醫生，伊tī提著台灣文學獎進前，tō捌tio̍h臺南文學獎、打狗鳳邑文學獎。《等路》ê冊皮ê介紹寫講伊向望家己ē當做台灣小說界的美空雲雀。我一直lóng想無伊是按怎beh按呢講，特別是我已經對美空雲雀無啥印象。一個減我beh 20歲ê人知影美空雲雀koh講伊beh做文學界ê美空雲雀，是誠特殊ê代誌。後來是看著洪老師的訪問，才了解。伊講，伊希望ē成為一个像『美空雲雀』的小說家，uì少年唱到老，m̄但聲域闊，領域多元，重點是久長。

Tsit集是冊內ê地景ê上尾仔集，感謝文化部ê補助，也歡迎逐家寫批來講恁對節目內容ê想法kah看法iah是分享恁遮ê冊ê感想。節目ê內容ê文字稿會刊tī《台語.生活》電子報，逐家ē使那聽那讀。